ДЭМБ-ын тодорхойлсноор 10-19 насны өсвөр үеийнхний 13-аас илүү хувь нь сэтгэцийн эмгэгтэй хэмээн оношлогдсон байна. Эрүүл мэндийн яам болон СЭМҮТ-ийн 2023 оны судалгаагаар Монгол улсад өсвөр насныхны сэтгэцийн эмгэгт өртсөн байх магадлал 11.1 хувьтай гарсан бол сэтгэл гутралын эзлэх хувь 49 хувьтай гарсан нь өсвөр насны 2 хүүхэд тутмын 1 нь сэтгэл гутралд өртсөн байгааг харуулж байна.
Амиа егүүтгэх явдал 15-19 насныхны нас баралтын дөрөв дэх түгээмэл шалтгаан болж байна. Жил бүр 10-19 насны 46,000 орчим хүүхэд, өсвөр насныхан амиа егүүтгэж байгаа нь бараг арван нэгэн минут тутамд нэг хүүхэд амьдралаа дуусгаж байна гэсэн үг юм. Монгол улсын хувьд нөхцөл байдал бүс нутгийн дунджаасаа 5 дахин өндөр байгаа юм.
15-24 насны залуусын 83 хувь нь сэтгэцийн эрүүл мэндийн асуудлыг ганцаараа шийдэхээс илүү бусад хүмүүстэй сэтгэл санаагаа хуваалцах, дэмжлэг авах замаар шийдвэрлэх нь зүйтэй гэж үзэж байгаагаа илэрхийлжээ. Дэмжлэг үзүүлэх хэрэгцээ шаардлага байгаа хэдий ч, дэлхий нийтийн засгийн газрууд сэтгэцийн эрүүл мэндэд зарцуулж буй дундаж зардал нь эрүүл мэндийн нийт зардлын дөнгөж 2.1 хувьтай тэнцэж байна.
Мөн сургууль болон гэр бүлийн орчин дахь сэтгэл санаа болон бие махбодын хүчирхийлэл, гадуурхалт, үе тэнгийнхний дээрэлхэл зэрэг асуудлуудын эзлэх хувь өндөр байгаа ч анхаарал хандуулж асуудлыг оношлохоос эхлээд урьдчилан сэргийлэх, цаашлаад анхан шатны тусламж үйлчилгээ үзүүлэх бодитой шийдэл нэвтрүүлээгүй байна.
Дээрх асуудлуудад шийдэл болохоор бүтээгдсэн blindcare аппликейшныг Боловсролын яам болон НҮБ-ын Хүүхдийн сан хамтран Ерөнхий боловсролын сургуулийн 13-18 насны сурагчдад мэдээлэл түгээх, таниулах, өсвөр үеийнхэнд үнэгүй зөвлөгөө, оношилгоо хийх, цаашлаад тайлан дата мэдээллийг шийдвэр гаргах түвшинд ил болгох зорилгоор хамтран ажиллахаар боллоо.
Эхний ээлжид 2024-2025 оны хичээлийн жилд 200 ерөнхий боловсролын сургуулийг сонгон нэвтрүүлэх бөгөөд үр дүнгээс хамааран цаашид бүх сургуульд нэвтрүүлэхээр төлөвлөөд байгааг дуулгахад таатай байна.
