Шинэ долоо хоногийн дугаарт маань “ЭнПиСи энд Мандал” компанийн бүтээгдэхүүн хөгжлийн хэлтсийн менежер, сэтгэл судлаач Базаррагчаагийн Ганзул уригдан оролцлоо.
Боловсрол
- 2010-2015 Монгол Улсын Их Сургууль-Сэтгэл Судлаач
Ажлын туршлага
- 2013 оноос setgel.mn Сэтгэл судлалын сайт үүсгэн байгуулагч, нийтлэгч
- 2013 оноос Сэтгэл Судлалын Үндэсний Төв-Сэтгэл судлаач
- 2013 оноос ЭнПиСи энд Мандал компани-Сэтгэл судлаач
Таны мэргэжлийн онцлог давуу тал
Сэтгэл судлалын мэргэжил хүнийг өөрчлөлтөнд бэлэн болгож чаддаг юм шиг санагддаг. Сэтгэл судлаач хүмүүсийн том давуу тал нь хэзээд өөрчлөгдөхөд бэлэн буюу аливаад уян хатан, нээлттэй хандаж чаддагт байдаг гэж боддог. Ч.Дарвины “Хэн хүчтэй нь биш хэн өөрчлөгдөж чадсан нь хамгийн хүчтэй” гэдэг үг шиг энэ мэргэжлийн давуу тал нь хүч чадал юмуу даа.
Ажлын төлөвлөгөө
Сэтгэл судлаач мэргэжлээрээ ажиллаад 4 жил болж байгаа боловч надад суралцах зүйл маш их бий. Энэ ярилцлага ч гэсэн залуу мэргэжилтэн гэдэг утгаараа их ялгаатай байх. Учир нь бидний үеийнхэн өөрийн гэсэн цор ганц ажлын чиглэл, салбараа бүрэн тодорхойлсон нь цөөн санагддаг. Энэ нь ч нэг талаараа зөв юм болов уу гэж бодогддог. Сонирхсон чиглэл болгондоо өөрийгөө сорьж, туршлагатай байж л илүү өргөн цар хүрээнд хөгжинө. Ажлынхаа үр дүнг “ном бүтээл” болон “ур чадвар” хоёроор хэмжиж бас төлөвлөнө. Чиглэлийн хувьд бие хүний хөгжил болон байгууллагын сэтгэл судлал байх болов уу гэж бодож байна.
Яг одоо төвлөрөн хийж байгаа судалгаа шинжилгээний ажил
Би 2013 онд анх Сэтгэл Судлалын Үндэсний Төвд туслах сэтгэл судлаачаар ажилд орж байсан. Одоо ЭнПиСи энд Мандал ХХК –д байгууллагын сэтгэл зүйн удирдлагаар ажиллаж байна. Манай байгууллага урт болон богино хугацааны хүний нөөцийн судалгаа болон хөгжүүлэлтийн хөтөлбөрийг хийдэг. Харин ажлын бус цагаар айдас болон өөртөө итгэх итгэл хүний сэтгэл зүй, амьдралын хэв маягт хэрхэн нөлөөлдөг талаар илүү судалж байна. Цаашдаа эмхэтгэл байдлаар гаргах бодолтой байгаа.
Өдөрт хэдэн цаг ажилладаг вэ?
8 цаг ажилладаг гэхдээ илүү цагаар суух өдрүүд цөөнгүй байдаг.
Ажилдаа хамгийн идэвхитэй ханддаг цаг
Сайн унтаж амраад өглөө ажил дээрээ эрт ирсэн өдөр хамгийн идэвхитэй бас бүтээмжтэй байж чаддаг. Нарийвчилж хэлвэл өглөө 8-11 цагийн хооронд орой 5-6 цагийн үед. Ажлын бүтээмжинд дасгал хөдөлгөөн их нөлөөлдөг гэдгийг мартаж болохгүй. Өмнөх өдөр нь эсвэл өглөө нь дасгал хийсэн бол тэр өдөртөө л цовоо сэргэлэн байж чаддаг. Бид ачаалал ихтэй үедээ унтаад эсвэл зүгээр л амраад байдаг нь буруу. Үүний оронд булчингаа илүү ажиллуулж байж л бие тань сайн амарна.
Амралтын өдрүүдээ хэрхэн өнгөрөөдөг вэ?
Сүүлийн үед IELTS өгөхөөр бэлдэж байгаа болохоор амралтын өдрөө аль нэг кофе шоп ороод хичээлээ хийгээд суудаг. Одоогоор гэр бүлдээ үүрэх хариуцлага байхгүй учраас амралтын өдөр өөрийгөө хөгжүүлэх боломж их гардаг.
Цагийг хэрхэн зөв зарцуулах талаар
Хийж байгаа зүйлээсээ сэтгэл ханамж, туршлага, эрдэм мэдлэг авч байгаа бол тэр үр дүнтэй цаг хугацаа. Харин үр дүнд нь сэтгэл ханамжгүй байна гэдгээ мэдэж байгаа бол яг одоо тухайн үйлдлээ зогсоох хэрэгтэй. Харин хэзээ, хэрхэн хийх нь тэр хүний онцлог, амьдралын хэв маягаас хамаарна.
Сэтгэл судлаачдын амьдралдаа хандах хандлага
Сэтгэл судлал талаасаа амьдралыг харвал их цэгцтэй, үр бүтээлтэй байх болов уу. Гэхдээ сэтгэл судлаач биш сэтгэл судлал гэж хэлсэн нь өөрөө учиртай. Сэтгэл судлаач болгон өөр өөрийн гэсэн үзэл баримтлал, зан чанар онцлогтой бие хүмүүс байдаг учраас амьдралдаа хандах хандлага нь ч мөн өөр өөр. Миний хувьд бол илүү бүтээлч, романтик, гүн гүнзгий ханддаг. Нэг бодлын уран бүтээлч, яруу найрагч хүнээс гарах хандлага шиг санагддаг шүү.
Ирээдүйд таны амьдралд гарах өөрчлөлтүүд
Өөрчлөлтүүдийг урьдчилан зөгнөх их хэцүү л дээ. Ямартай ч төлөвлөөд түүндээ найдаад л хөдөлмөрлөж байна.
Баримталдаг зарчим
Зориглон хэлэхэд миний хувьд суралцах болон тэвчээр гэсэн чанарууд юм болов уу.
Ямар нэг зүйлд суралцаагүй, идэвхигүй байгаа цаг хугацаа миний хувьд зогсонги өдрүүд шиг санагддаг. Тийм болохоор үргэлж өөртөө одоо юу хийх ёстой билээ? Миний зорилго юу билээ? гэдэг асуултыг тавьдаг. Заримдаа миний хамгийн сайн хийж чаддаг зүйл “тэвчээр” юм шиг санагддаг. Тэвчээр гэдэг зарчмын маань цаана хийж болохгүй зүйлийг тэвчих, хийх ёстой зүйлээ тасралтгүй хийх хоёр хоёулаа багтана.
Өөртөө амьдралдаа сэтгэл хангалуун байхад нөлөөлөх хүчин зүйл
Өөртөө сэтгэл ханамжтай байхын тулд аль нэг үнэт зүйлээсээ ангид өөрийгөө хайрлаж, үнэлж чаддаг байх хэрэгтэй. Үгүй бол саад бэрхшээлүүдийн дараа эсвэл үнэт зүйлүүдээ алдаж ихээр шархлах болно.
Харин амьдралдаа сэтгэл хангалуун байхын тулд гэр бүл, санхүү, харилцаа холбоо, эрүүл мэнд, ажил, карьер гээд бүх л зүйлээ тэнцвэртэй байлгах хэрэгтэй. Аль нэг дээр нь амжилттай байлаа гээд бусдыг нь орлож чадахгүй. Энэ хоёр зүйлийг л ойлгоод, суралцчихвал сэтгэл хөдлөл, мэдрэмжүүдээ удирдахад их дөхөм байх болно.
Амьдралаас авдаг хамгийн сайхан мэдрэмж
Сайхан мэдрэмжүүд их олон байна. Тэр дундаас бусдаар хайрлуулах, хүндлүүлэх, халамж авах нь их сайхан байдаг.
Хамгийн их хийж үзэхийг хүсдэг зүйл
Аялах, эрсдэл гаргах, айдаг зүйлүүдээ даван туулах, шинэ хүмүүстэй танилцах, ном бичих гээд олон зүйл бий.
Хамгийн сайн хийж чаддаг зүйл
Бусдад болон өөртөө хариуцлагатай ханддаг юм болов уу. Бусдын өгсөн үүрэг даалгаврыг цагт нь хийх, өөртөө тавьж байгаа дүрмүүдийг даган мөрдөж чаддаг. Жишээ нь: Эрүүл хооллох ёстой гэсэн бол өөрийнхөө төлөө амттай зүйлүүд нүдний өмнө байсан ч тэвчиж чадна.
Бусдад байнга хэлдэг үг
Хариуцлагаа хүлээж чадаж байгаа бол хүссэн зүйлээ туршиж үз гэж найзууддаа их зөвлөдөг. Хариуцлагаа өөрөө хүлээнэ гэдэг чинь л өөрийнхөөрөө байна гэсэн үг гэж ойлгодог.
Одоо уншиж буй ном
Уран зохиолын номнуудыг унших дуртай. Яг одоо Кен Фоллеттын “Гурав дахь ихэр” гэдэг номыг уншиж байна. Мэргэжилтэй маань ч их ойр юм.
Хүмүүсийн эерэг сөрөг хандлагын тухайд
Мэдээж маш олон төрлийн хүчин зүйл нөлөөлж байгаа. Гэхдээ хамгийн чухал нь өргөн хүрээнд юмыг харахгүй байгаатай нь холбоотой юм болов уу гэж боддог. Зөвхөн өөрийнхөө өнцгөөс хараад үнэлэлт дүгнэлт өгөөд байна гэдэг алдаатай. Үүнийг засахын тулд олон хүнтэй уулзаж ярилцаж, бас их ном унших хэрэгтэй.
Сэтгэл судлаачид нийгэмд ямар байр суурьтай байна вэ?
Сэтгэл судлаач гэдэг хүн нийгэмд их хүндлэгддэг. Хүмүүсийн дунд мэргэжлээ хэлэхээр өөрийн эрхгүй асуултууд ундраад би өөрөө ч биеэ цэгнээд эхэлдэг. Гэхдээ яг юу хийдэг вэ? гэдэг тал дээр төдийлөн ойлголтгүй байгаа юм шиг санагддаг. Тийм ч учраас сэтгэл судлаачдаас хэтэрхий их зүйл эсвэл огт өөр хүрээний зүйлийг шаардаад байдаг. Ядаж л сэтгэл зүйн зөвлөгөө гэдгийг бүрэн ойлгох хэрэгтэй.
Улсын ирээдүй таны нүдээр
Энэ тал дээр далайцтай хариулт өгч чадахгүй байх гэж эмээж байна. Иргэн хүний хувьд их өөдрөг хандаж байгаа. Улс орондоо өөрийн хүч, ур ухаанаа зориулах залуучууд маань хөдөлмөрч бас чадварлаг байна. Гол нь эх орноо гэсэн сэтгэлтэй л байх хэрэгтэй.
Ярилцсанд баярлалаа танд сайн сайхныг хүсье.
