Шинэ долоо хоногийн дугаарт маань Хавдар Судлалын Үндэсний Төвийн сэтгэл зүйч Чимэдцэрэнгийн Аззаяа уригдан оролцож байна.
Боловсрол
- 2000-2006 онд ОХУ Эрхүүгийн Их Сургууль-Сэтгэл судлаач
- 2008 онд ОХУ Эрхүүгийн Их Сургууль-Магистр
- 2012 он Анагаахын Шинжлэх Ухааны Үндэсний Их Сургууль-Докторант
Ажлын туршлага
- 2006 оноос Хавдар Судлалын Үндэсний Төвийн Сэтгэл зүйчээр тасралтгүй 11 дэх жилдээ ажиллаж байна.
Таны мэргэжлийн онцлог давуу тал
Би сэтгэл зүйч мэргэжлээ маш их сонирхож сонгосон. Хүсч мөрөөдөж байсан мэргэжлээрээ өөрийн сонгосон замаар явж, хүнд өвчний улмаас шаналж байгаа хүмүүстэй ажиллаж, сэтгэл санааны дэмжлэг үзүүлдэг нь миний мэргэжлийн онцлог гэж бодож байна.
Ажлын төлөвлөгөө
Хавдартай хүмүүс болон түүний гэр бүлийн гишүүдэд үзүүлэх сэтгэл зүйн тусламжийг илүү өргөн хүрээтэй болгох, олон хүнд хүргэх тал дээр ажиллаж байна. Жил бүр ажлын төлөвлөгөө гаргаж ажилладаг. Энэ жилийн хувьд судалгааны ажлаа өргөжүүлэх, өвчтөнүүдийн дунд дэмжих бүлэг зохион байгуулах гээд төлөвлөсөн ажлууд олон байна.
Яг одоо төвлөрөн хийж байгаа судалгаа шинжилгээний ажил
Яг одоогоор сувилагч нарын дунд “мэргэжлээс хальшрах хам шинж”-ийн судалгааг хийж байна.
Өдөрт хэдэн цаг ажилладаг вэ?
Ажлын цаг 08.30-17.00 хүртэл байдаг.
Ажилдаа идэвхитэй ханддаг цаг
Ихэнх үед цаг товлож үйлчлүүлэгчтэй уулздаг учир ажлын цагтаа идэвхитэй байдаг. Үйлчлүүлэгчгүй байх үед үдээс өмнө унших, бичих, боловсруулах ажлаа хийхийг хичээдэг.
Амралтын өдрүүдээ хэрхэн өнгөрөөдөг вэ?
Гэр бүлтэйгээ өнгөрүүлэх дуртай.
Цагийг хэрхэн зөв зарцуулах талаар
Цагийн юмыг цагт нь хийх ёстой гэдэг баримтлалыг боддог. Гэхдээ зарим талаараа чадахгүй байх, хоцрох, цагийг нь тулгах гэх мэт дутагдалтай талууд байдаг. Энэ дутагдалаа засахыг хичээдэг.
Сэтгэл судлаачдын амьдралдаа хандах хандлага
Аливаа зүйлийг илүү олон өнцгөөс харахыг хичээдэг гэж боддог. Хань ижил, үр хүүхэд, хамт олон, үйлчлүүлэгчидтэйгээ гээд ямар ч хүнтэй харилцсан тэр бүрийг илүү олон өнцгөөс харах чадвартай нь бидний мэргэжлийн онцлог юмуу даа. Зөвхөн нэг өнцгөөс харах үзлээс хандахаас илүү олон талаас харж ханддаг нь аливааг шийдэх, сэтгэл зүйн хувьд уян хатан чадвартай байхыг бусдаас илүү эзэмшсэн байдаг болов уу гэж бодож байна.
Ирээдүйд таны амьдралд гарах өөрчлөлтүүд
Мөрөөдөл, хийхийг хүсч байгаа зүйлүүд бий. Хүссэн зүйлүүдээ хийсний дараа маш их сэтгэл хангалуун байна байх.
Сэтгэл судлаачийн үүднээс бусдад өгөх зөвлөгөө
Ажлын онцлогоос болоод хавдартай, хүнд өвчтэй хүмүүстэй ажилладаг. Энэ хүмүүсийн онцлогийг харж байхад аливаа асуудлыг даван туулах, шийдэх, стрессийг тайлах чадвар сайн суусан хүмүүс нь амьдралд тохиолдож байгаа хүнд хэцүү зүйлийг давах чадвар илүү өндөр байдаг. Тийм болохоор таны амьдралд өдөр тутамд тохиолдож байгаа бэрхшээлүүдээ зөв зохицуулах, даван туулах, стрессээ зөв тайлах арга барилыг сайн эзэмшиж чадах юм бол танд юу ч тохиолдсон түүнийг даван туулах чадвартай байна гэсэн үг.
Баримталдаг зарчим
Хүн юуны үр тарина түүнийгээ л хурааж авдаг. Бусдад ямар сэтгэлээр хандана, бусдад яаж хандана яг түүнийгээ л буцаагаад авна гэдэг зарчмыг баримталдаг.
Өөртөө амьдралдаа сэтгэл хангалуун байхад нөлөөлөх хүчин зүйл
Та асуудлыг яаж хүлээж авч байна, ямар өнцгөөс харж байна гэдэг чинь л таныг тодорхойлж байгаа.
Амьдралаас авдаг хамгийн сайхан мэдрэмж
Гэр бүл, ойр дотны хүмүүс, найз нөхөд маань намайг хүндэлж хайрлаж байна гэдгийг мэдрэх тэр мэдрэмж.
Хамгийн их хийж үзэхийг хүсдэг зүйл
Одоо хийж үзэх юмсан гэж бодож байгаа нь “мэргэжлийнхээ талаар ном бичих” юмсан гэж боддог.
Хамгийн сайн хийж чаддаг зүйл
Миний хувьд бие махбодийн эмгэгтэй хүмүүст сэтгэл зүйн талаас нь зөвлөгөө өгдөг. Эрүүл мэндийн салбарт ажиллаж байгаа мэргэжилтний хувьд ажлаа сайн хийхийг хичээдэг.
Бусдад байнга хэлдэг үг
Хүнд урмын үгсийг хэлэхийг эрмэлздэг.
Одоо уншиж буй ном
Гамшгийн үеийн сэтгэл зүйн тусламж, үйлчилгээ гэдэг чиглэлээр ном уншиж байна.
Хүмүүсийн эерэг сөрөг хандлагын тухайд
Эерэг, сөрөг хандлага маш олон зүйлийг тодорхойлоод байна. Жишээлбэл: хорт хавдар туссан хүн байна гэж бодоход сөрөг хандлагаар хүлээж авбал гарах үр дүн нь өөр байна. Эерэг хандлагаар хүлээж авах юм бол бас өөр. Өвчтөнүүдийн мөн ар гэрийнхэний хувьд ялгаагүй. Эерэг сөрөг хандлагын нөлөө маш их байна гэдгийг би өдөр тутмынхаа ажил дээр мэдэрдэг учраас тухайн хүн сөрөг бодолтой болоод, стресст их ороод, амьдралыг харах үзэл чинь арай илүү өөрчлөгдөөд ирэх юм бол энэ танд нэг дохио л өгч байна гэсэн үг. Өөрчлөх, стрессээ зөв тайлж сурах, сэтгэл зүйн байдалдаа анхаарал хандуулах, зөв амарч байх хэрэгцээтэй. Эерэг сөрөг хандлага гэдэг бол ерөнхийдөө амьдралыг тодорхойлж байна.
Сэтгэл судлаачид нийгэмд ямар байр суурьтай байна вэ?
Сэтгэл судлалын шинжлэх ухаан бол Монгол орны хувьд арай шинэлэг байгаа. Хүмүүсийн хүлээж авах, ойлгох, мэргэжлийн түвшинд хүлээж авах тал дээр. Сүүлийн үед хүмүүс сэтгэл зүйч дээр очих ёстой гэдэг бодол тээдэг, зарим нь ирдэг болсон. Мэдээж бид өөрийнхөө мэргэжилдээ үнэнч байж, бусдад энэ мэргэжлийнхээ үнэ цэнийг сайн ойлгуулж чадах юм бол мэргэжил маань улам хөгжөөд сайн байх болов уу гэж бодож байна. Биднээс бидний мэргэжлийн нэр хүнд шалтгаалж байгаа учраас өөрсдийнхөө ажиллаж байгаа салбартаа л сайн байх ёстой гэсэн бодолтой байна.
Улсын ирээдүй таны нүдээр
Иргэн хүний хувьд үр хүүхдээ сайн хүмүүжүүлж, соёлтой, боловсролтой хүн болгох нь миний улсынхаа төлөө хийж байгаа алхам гэж боддог. Харин мэргэжилтний хувьд хэлэхэд нийгэм өөрчлөгдөхийн хажуугаар хүмүүсийн сэтгэл санааны байдал ч их өөрчлөгдөж, бухимдал, стресст орох нь ихэсч гэр бүлийн асуудал, эдийн засгийн хямрал гээд нөлөөлөх зүйл дэндүү их болсон. Бид хүвь хүний хөгжлийг, гэр бүлийн орчныг анхаарч хөгжүүлвэл манай улсын ирээдүй илүү гэрэлтэй байна гэдэгт итгэлтэй байна.
Ярилцсанд баярлалаа танд сайн сайхныг хүсье.
